Dagiti Istoria ni Managdaliasat ken Mannursuro a Mannurat nga Ilokano AM-AMMO NI ILOKANO a managdaliasat ad-adda a gapu iti panangtun-oyna iti naimbag a biag. Isu ti gapuna nga adda iti amin a suli ti lubong nangruna kadagiti disso a makuna a naraber a pagaraban. No agistoria ngarud, ad-adda nga agtalimudok iti lugar a nadanonna a nangipasdekanna metten iti pagtaenganna. Manmano, no adda man, ti Ilokano nga agbilang iti kas kaadu dagiti bituen iti langit ti karuay ti nadanonna a nanggedan ken addaan iti nawadwad a maistoria maipapan iti dayta a lugar. Maibilang ngarud a naidumduma dagiti padas ni Apo Vicente P. Palcong a nakagteng kadagiti nadumaduma a lugar iti Asia gapu iti trabahona kas eksperto iti kabaelan teknikal, ket kadagiti lugar a nadanonna, addaan iti naidumduma a mutektek—kadawyan a gupit ti kas kenkuana a mannurat. Idiaya daytoy a libro dagiti personal a padas ti autor maipapan iti panagpaspasiarna bayat ti panangisayangkatna iti trabahona, wenno bayat ti nawaya a tiempona. Saan ngarud laeng a dagiti madadaan nga impormasion iti internet ken dadduma pay a rekurso ti maammuan, no di pay ti personal a tips ti autor, tapno iti kasta, mabalin a makainut iti gastos ken oras ni turista nga Ilokano. Pagimbaganna, daytoy a libro, saan laeng a tarabay para kadagiti turista nga Ilokano. Tarabay pay daytoy kadagiti kakailian a mangsirsirig kadagiti pagilian iti Asia a pagobraan. Iti daytoy a libro, ibingbinglay ti autor dagiti personal nga ammona maipapan kadagiti kasasaad iti maysa a partikular a nasion a nairaman iti daytoy a libro, ken dagiti panglakagan tapno iti kasta, matarabay ni kailian nga agpangpanggep nga agobra kadagitoy a pagilian. Adda pay nayonna a tips kadagiti mabalin a nayon a pamastrekan kas iti panaglakolako iti kankanen, serbisio, ken dadduma pay. Malaksid a naimbag daytoy a libro kadagiti Ilokano a turista ken mangmangged, amano pay kadagiti iskolar iti kultura ken historia dagiti pagilian iti Asia. Malaksid a baro (updated) dagiti madadaan nga impormasion maipapan kadagitoy a pagilian, adda dagiti utob-nakem (insight) ti autor maipapan iti maysa a pagteng ti pakasaritaan, wenno lugar ken pasdek ti madakdakamat a pagilian. Pagimbaganna ta malaksid a mannurat ti autor, maysa daytoy a mannursuro kadagiti teknikal a kabaelan ket ad-adda a nakapan iti maysa a lugar gapu iti daytoy tapno matarabay iti daytoy nga aspekto ti napananna a lugar. Praktikal a punto de bista ngarud ti naidiaya iti daytoy a libro nga ad-adda nga adda banagna para kadagiti agbasbasa nga Ilokano nangruna kadagiti managpasiar wenno addaan iti ‘sidingan a dapan’, kadagiti adda panggepna nga agobra iti sabali a pagilian, ken kadagiti iskolar iti historia ken kultura a kayatda ti mapabaro ti ammoda maipapan kadagiti pagilian iti Asia. Maibilang a dayawtayo nga Ilokano ni Apo Palcong gapu iti panangibinglayna kadagiti ammona kadagiti pada nga Asiano. Kasta met a maipagpannakkel nga Ilokano para kadagitoy a padas ken mutektekna a sagutna kadatayo a kakailianna babaen daytoy a libro.