Yen dirasakake kanthi tenanan, buku "Sairis Semangka" karyane Syafi Rilla S. Maghfuroh iki ora mung saderma ngangkat crita-crita ngenani katresnan. Ing sawalike masalah kang kudu diadhepi lan dipecahake para paraga-paragane, nyatane ana sawijining piwulang kang bisa dijupuk lan sabanjure bisa didadekake sangu leladi tumrap pamacane. Crita kang runtut, pamilihing basa kang 'ramah' kanggo generasi milenial, tema-tema kang kekinian, tanpa ninggal rasa Jawa-ne sajroning crita kang kaanggit mujudake kaluwihane Syafi Rilla S. Maghfuroh. Ing perangan liya, lumantar bukune iki kasil mbuktekake yen crita-crita roman basa Jawa bisa mlaku bebarengan klawan ilining jaman tanpa kudu ninggal utawa nerak paugeran. Saengga panganggep sastra Jawa, mligine crita-crita romane wis kuna merga ora laras klawan lakuning jaman sawutuhe kliru. (Romance Short Stories)